E Zinzale

Eccu… compiu l’estate, quasi smariti i turisti, ci tocca à fà i nostri conti. Quantu sò i furesteri venuti quist’annu ? Induve ? Quantu hanu spesu ? Quale chì ne prufitta u più ? È ùn si sente chè lagnanze di tutte e manere ! À chì si lagna d’ùn avè pace inde a so marina o u so fiume cusi sereni, à chì si lagna d’ùn avè vistu à nimu ind’u so stazzu muntagnolu, à chì si lagna di troppu ghjente senza rispettu in paese, à chì si lagna d’esse servutu da qualchì barman ch’ùn sà prununzià « Orezza » o « Zilia »… È ognunu si lagna di u rancichisimu di i visitori, di e millaie di tonne di mulizzu da riccoglie, di l’acqua schersa è torbia, di i sgotti tapati, e cetera, e cetera. Ma sò forse i listessi chì bramanu à u 2013, aspettendu cum’è d’abitudine, chì i trè mesi d’istatina fessinu campà nove mesi sani ! È tandu ci vole à ramintassi chè no simu soli rispunsevule di e nostre scelte : ci tocca à riflette à u sviluppu chè no vulemu.
A long’andà forse per via di un veru prughjettu di sucietà sempre à cuncipì. Ma bisognu à apre l’ochji subitu per vede chi a razzià à più pessima per a Corsica ùn vene micca da u fora : ma l’associ per l’ambiente sò belli soli à dilla ! Belli soli è belli debuli. Ma dice u pruverbiu : « sì tù credi esse troppu chjuchu di fronte à u gran putere, prova à dorme una notte cù una zinzale è dimmi quale hè chì impedisce l’altru di dorme ? ».