Evviva U tour de France

Vistu u rimore ùn vi hè scappatu chè no simu stu rughjone furtunatu chì riceve u tour de France !

Maraviglia di tutte e maraviglie spurtive (fora di u Sporting)… Vole si dì chì u mondu sanu fieghja a Corsica. Sapiamu innanzu ch’è no eramu u centru di u mondu : avà simu forse u bilicu di l’universu. E dunque ghjè l’universu chì ci sguarda. E chì mustremu ? Bella sicura i visitori cumpreranu dinu i vasetti cù Napulione è Joséphine, e magliette cù a testa di moru è ancu a bandera è un dischettu di I Muvrini… Ma chì avimu à mustra di richezza vera ? Un aria linda senza u velenu di u fioul di u Vazziu o di Lucciana ? Un acqua linda ind’è i fiumi ? Una furesta sana saniccia ? Una machja chì ùn hà micca brusgiatu ? Una marina senza “paillote” ? U marinu micca stirpata da i 4×4 è i quad ? Un litturale ch’ùn sia micca sprufundatu da e custruzzione “pieds dans l’eau” for di lege ? A rumenzula longu a strada chì fiurisce più chè mai ? Senza scurdassi di e vitture rughjinose lampate mezza muchji e filetta ! Tutti st’esempie sò un spechju di l’amore è di u rispettu ch’è n ‘avimu di a nostra terra. D’issa terra lasciata da i nostri antenati, chì n’avimu fattu ? E orgugliosi cum’è simu, c’allegremu d’esse u centru di u mondu quand’ellu passerà u gran giru… forse una festa, peccatu chì di Kallistè n’appiamu fattu un ruminzulaghju tamantu ! E dunque per quelli chì cercanu “la vraie Corse”, basta à risponde : eccu la quì ! Evviva u tour de France !